Carlos Hugo (Les Noticies)

Les Noticies, 29 d’agostu del 2010

Faustino Zapico

 

L’otru 18 d’agostu morría en Barcelona Carlos Hugo de Borbón-Parma, pretendiente carlista. Yera fíu de Javier de Borbón-Parma, qu’asumiera la xefatura del carlismu en 1936 depués d’estinguise la llinia descendiente directa de Carlos de Borbón.

 

La noticia tien interés porque tanto’l carlismu como’l so pretendiente son en sí mesmos historia viva d’esti pueblu. Anque la imaxe que se da del carlismu nos llibros de testu ye la d’un simple movimientu lexitimista y reaccionariu de la España del sieglu XIX, asina como la d’un de los principales pegoyos del alzamientu y dictadura franquista, la so historia ye infinitamente más rica como pa despachala nun par de frases xenériques. La familia Borbón-Parma, cola escepción del hermanu ultra, Sixto Enrique, fo ún de los factores qu’ayudó al espectacular xiru hacia la esquierda que dio’l carlismu nos años sesenta del sieglu XX, xiru que dexó fuera del movimientu a bona parte de la so base social, especialmente n’Asturies, onde la figura de Jesús Evaristo Casariego acapara la imaxe del carlismu per tola transición. Lo que quedó fiel a Carlos Hugo, un proyectu que se dicía con abonda sinceridá como socialista autoxestionariu, federalista y cristianu, fo eficazmente tocáu de muerte na operación Montejurra de 1976, responsabilidá d’esos dos grandes demócrates llamaos Adolfo Suárez y Manuel Fraga. Depués, l’escaezu, como tantos otros proyectos prometedores de la que morrió Franco.

 

Llevo munchos años lleendo y reflexonando sobre’l carlismu y siempre me paeció que lo más asemeyao a esi movimientu yera’l peronismu arxentín:un movimientu policlasista que nun determináu momentu históricu pue xugar un papel reaccionariu o progresivu, sigún les circunstancies, y que, superada la coyuntura que lu vio nacer, escacha en milenta grupos que puen dir de la ultraderecha a la esquierda radical. La so monarquía republicana yera imposible, pero tamién lo ye’l republicanismu monárquicu del PSOE y nun mos quexamos tanto. Descanse en paz.