D. CARLOS HUGO

La Voz de Asturias.

José Luis Piquero

05/12/2004

 

              La pasada selmana tuvo n’España D. Carlos Hugo de Borbón Parma, presentando un llibru. La noticia nun se pue dicir que saliera gran cosa na prensa. Lóxico. Habrá munchos a los que’l nome nin-yos suene. Carlos Hugo ye’l titular de los derechos dinásticos de la lexitimidá carlista, un rei ensin corona como lo foron los sos antecesores. Amás, el Partíu Carlista ta sumerguyáu dende finales de los años 70 nuna grave crisis política, nun momentu realmente crepuscular. Nostante, si dalgún movimientu social o políticu n’España amosó capacidá de supervivencia esi ye’l carlismu. El partíu ta dispersu, viviendo una esistencia cásique testimonial, con malpenes un puñáu de militantes, dalgunos boletinos y revistes y unos resultaos electorales más que probetayos. Pero alienda. Y va pa 180 años.

 

            La evolución del carlismu resulta fascinante. Nacíu al calor de los movimientos contrarrevolucionarios del absolutismu fernandín, alcontró encarnación na pretensión al tronu del infante Carlos María Isidro, qu’aglutinó a los elementos más reaccionarios de la España d’entós. L’enfrentamientu de carlistes y lliberales dio orixe a dos enconaes guerres nos años 30 y 70 del sieglu XIX y, en ciertu mou, a una tercera yá nel sieglu XX: la Guerra Civil, na que los carlistes supunxeron un gran apoyu pal bandu nacional. Sicasí, n’acabando la guerra, Franco unificó al carlismu cola Falanxe en FET y de les JONS, traicionando los ideales tradicionalistes. El carlismu volvióse entós escontra la dictadura y pasó a la oposición.

 

            Baxo la dirección de Carlos Hugo, el movimientu foi evolucionando dende’l tradicionalismu a un socialismu democráticu, autoxestionariu y federalista, desprendiéndose de los elementos más reaccionarios y ultraderechistes. Formaron parte na transición de la Platajunta y más alantre llegaron a integrase n’Izquierda Xunida, coalición qu’abandonaron pa entrar nun rápidu declive.

 

            Los carlistes foron los primeros en defender los derechos territoriales de rexones como Cataluña, el País Vascu o Navarra (los antiguos fueros) y el so federalismu preludia l’autonomismu actual y llévalu tovía más alantre. N’Asturies, el Partíu Carlista defende la oficialidá del asturianu y un estatutu que nos convierta nuna comunidá de primera.

 

            D. Carlos Hugo, conocíu como “el príncipe roju”, un príncipe ensin principáu que nos años 60 llegó a pasar dos meses trabayando d’incógnitu nuna mina asturiana pa conocer de primer mano esa realidá, vien agora a España, avaláu por una trayectoria política exemplar y un llabor como profesor n’universidaes americanes y autor de numberosos llibros. Un personaxe fascinante, ensin parangón na historia recién d’esti país; un verdaderu lluchador poles llibertaes qu’anguaño esfrutamos. Pero, por desgracia, dalguién que pasa cásique desapercibíu. Qué poca memoria, toos nós. Qué pena.