Contra les agresiones facistes y racistes n'Uviéu
Noticies
¿Vas aguantar otra vuelta de tuerca?
.
El Partíu Carlista d’Asturies llama a a participar na manifestación que mañana tienen convocada los sindicatos SUATEA, SF, CGT y CSI col llema ¿Vas aguantar otra vuelta tuerca? con salida na Plaza l’Humedal de Xixón a les 19:30 hores contra los recortes sociales.
.
Manifiestu de la Corriente Sindical d’Izquierda (CSI)
.
Asturies avanza hacia los 100.000 paraos y paraes, mientres que l’Estáu español acércase a los 5 millones. El 40 % de la mocedá y, polo menos, el 30 % de les muyeres ta nel paru. Cola reforma llaboral y los recortes sociales, el gobiernu abarata y facilita’l despidu, baxa los sueldos, favorez l’emplegu temporal y precariu, empeora les condiciones llaborales y dexa nel paru a los y les trabayadores.
El 72 % de los y les pensionistes cobren menos de 1.000 €. El 58,5 % (más de la metá) cobren menos de 600 €. Quieren aumentar a venti’l númberu d’años de cotización pal cálculu de les pensiones (fálase, incluso, de tola vida llaboral). Quieren aumentar, tamién, el númberu d’años de cotización p’algamar la pensión contributiva (actualmente 15 años). Aumenta a cuarenta’l númberu d’años p’algamar el 100 % de la pensión (actualmente 35 años). Xuben la edá de xubilación a los 67 años.
Con too ello, la cuantía de les pensiones reduzse un 5 % de media. El gobiernu plantega recortes sociales pa faer “un plan d’aforru énte la crisis”, pero regaló 150.000 millones d’euros a los bancos (los causantes verdaderos de la crisis). Énte esto, ye menester crear una banca pública qu’actúe como dinamizadora de la economía productiva y que ponga frenu a la fartonería de la banca privada, crear un impuestu nuevu sobre los beneficios bancarios, eliminar les SICAVS (ún de los abellugos de les grandes fortunes que, por una bula del gobiernu, coticen al 1 % en vez d’al 35 %) y gravar toa operación financiera con destín a un paraísu fiscal o que nun tenga una fin productiva.
El gobiernu sigue ensin poner frenu a un fraude fiscal que supón una estafa superior al 30 % de lo recaudao por Facienda. Ye menester un plan de llucha escontra esti fraude fiscal y que pague más el que más tien. Por eso ye menester implantar un impuestu nuevu sobre los beneficios de les grandes empreses y multinacionales obligándoles a reinvertir el 50 % de los beneficios nel sitiu onde s’asienten les plantes.
Ye imprescindible la creación d’un fondu de reserves financieres, a cargu de les organizaciones empresariales, pa financiar les empreses en crisis o en quiebra. Cuando consiguieron beneficios multimillonarios lleváronlos a paraísos fiscales; agora diben sirvir pa reflotar empreses. Tamién ye necesario llanzar un plan pa “sacar a flote” la economía somorguiada, que supón una bolsa de fraude (dineru negro) de más de 65.000 millones d’euros. Queremos que se pongan en práutica una serie de midíes que redistribuyan la riqueza y garanticen un nivel de vida dignu pa toes y toos:
- Emplegu estable y salariu dignu pa toes y toos.
- Renta básica universal. Drechos básicos (alimentos, salú, vivienda y educación) garantizaos pol Estáu. Paralización de los procesos d’embargu y desahuciu a los y les trabayadores en situación de precariedá o desemplegu.
- Repartu del emplegu: reducción de la xornada llaboral ensin perda de salariu.
- Prohibición de faer hores. Trabayar toes y toos pa trabayar menos.
Fuelga xeneral y muncho más
COMUNICÁU DE LA CORRIENTE SINDICAL D’IZQUIERDA (CSI)
LA SITUACIÓN REAL: Asturies va camín de los 100.000 paraos y paraes, mientres que nel Estáu español acercámosmos a los 5 millones. Otros 5 millones de trabayadores nun lleguen al Salariu Mínimu Interprofesional (635 €). El 40 % de la mocedá ta desemplegao. Un millón y mediu de families tienen a tolos integrantes en paru (30.000 d’eses families son asturianes). Los sueldos nun algamen a la final de mes, la probitú y la precariedá van n’aumentu y l’emprobecimientu del conxuntu de la población ye cada vez más evidente.
LA PATRONAL Y LA BANCA: pretenden siguir consiguiendo los mesmos beneficios que nos bonos tiempos económicos a costa del dineru público y del bolsu de los y les trabayadores. Quieren que trabayemos más y que cobremos menos, faciendo a los ricos más ricos y a los probes más probes.
EL GOBIERNU: verdaderu pelele de la patronal y la banca, impón una reforma llaboral qu’abarata y facilita’l despidu (d’esta miente vuelve los contratos fixos n’eventuales), conxela y disminúi los salarios, reduz les pensiones o suprímeles, xube la edá de la xubilación a los 67 años, fai más precariu’l mercáu de trabayu y les condiciones llaborales, recorta les inversiones sociales y privatiza y deteriora la sanidá, la educación y los servicios públicos.
Pero, al tiempu, regala cientos de miles de millones d’euros a la banca y permite la continuidá d’una economía somorguiada (dineru prieto) que supón daveres una estafa a Facienda de más de 65.000 millones d’euros.
LOS SINDICATOS UXT Y CC OO: lo mesmó ún qu’otru son dinosaurios burocratizaos, con una casta dirixente cómpliz, bien de veces, del gobiernu y la patronal, financiaos y sosteníos polos distintos gobiernos (incluyíos los autónomos y de conceyos), con un exércitu de lliberaos que, munches veces, busquen un abellugu pa safase del trabayu. Agora, el 29 de setiembre entamen una fuelga xeneral que, por primer vez na Hestoria, convócase con 3 meses d’antelación y con una reforma llaboral aprobada y que yá se ta aplicando de manera abondo xeneralizada. Nun podemos siguir enfotaos nestos sindicatos porque los sos dirixentes nin puen nin quieren defender los drechos de los y les trabayadores.
LA FUELGA DEL 29 DE SETIEMBRE: na CORRIENTE SINDICAL D’IZQUIERDA tamos por faer, non solo una fuelga, sinón toles fuelgues xenerales y sectoriales que faigan falta pa frenar la reforma llaboral y les midíes antisociales del gobiernu y la patronal, pero nun vamos participar con aquellos que consideramos cómplices d’esta realidá dura en nengún actu o convocatoria.
Poro, pidimos a tolos y toles trabayadores que’l 29 de setiembre que vien nun vayan al trabayu y que participen na manifestación que la CSI va convocar el día 29 en Xixón a les 13:00 en La Plaza l’Humedal.
Funeral por don Carlos Hugo de Borbón Parma nUviéu/Oviedo
Dende’l Partíu Carlista d’Asturies informamos de que se va a cellebrar un funeral en llingua asturiana n’alcordanza de don Carlos Hugo de Borbón Parma, fallecíu recientemente, el vienres 27 d’agostu a les 18:00 hores nel Santuariu del Santu Cristu de les Cadenes (Avenida del Cristo, 99, Uviéu/Oviedo).
Apuntes biográficos de don Carlos Hugo de Borbón Parma
El Partíu Carlista sofita la campaña Democracy for Asturies
COMUNICÁU
El Partíu Carlista d’Asturies considerando que'l réxime lliberal-caciquil esistente anguaño n’Asturies afitase estructuralmente nun secuestru permanente de la soberanía popular comunica públicamente la so decisión de sumase a la campaña “Democracy for Asturies” en cuantes qu'entiende que constitúi un espaciu potencial pa desendolcar un trabayu xunitariu dende distintes posiciones ideolóxiques.
Reparando en que sí bien n’Asturies esisten dellos procedimientos y mecanismos institucionales que son propios d’una “democracia formal” el desendolcu d’una sociedá vraeramente democrática vese torgáu por numberosos factores a toos los niveles.
De mano'l marcu constitucional esistente afitase nuna “Constitución” que nun ye una constitución democrática ellaborada dende la mesma sociedá tres un procesu vraeramente constituyente sinón una “carta otorgada” poles oligarquíes franquistes. Asina al nun dase nos años 1970 nenguna rotura democrática col franquismu el réxime carez de cualquier tipu de llexitimidá d'orixe dende una perspeutiva democrática. Dientro del marcu constitucional posibilitase'l status autonómicu vixente n’Asturies anguaño, pero tala "autonomía” ye estructuralmente dependiente del Poder central y polo tanto anulable llegalmente con independencia de la voluntá popular asturiana. Tamos pos énte un autogobiernu concedíu esternamente dende enriba que nun permite la materialización real del pueblu asturianu como suxetu políticu. Amás l'autonomía esistente consiste na simple delegación de competencies a una Alministración "periférica” ensin que esto se traduza en nengún momentu nun desendolcu de la capacidá real d'autogobiernu de la mesma sociedá civil n’Asturies. La esistencia d'un sistema eleutoral antipluralista que favorez el bipartidismu, l'ausencia de mecanismos de participación y control ciudadanu, la destruición de la cultura democrática esistente nos años 1960 y 1970 col paralelu espardimientu de pautes socio-culturales que promueven la desmovilización y l'irresponsabilidá comunitaries, y la clientelización de gran parte de la sociedá asturiana al traviés de practiques caciquiles, conformen una realidá sociu-política incalificable como plenamente democrática.
Nun se trata pos de reivindicar namás que la ciudadanía asturiana sía la titular de la soberanía sinón de que se constituya vraeramente nel so suxetu efeutivu pudiendo determinar non yá cual ye’l modelu d'estructures xurídico-polítiques sinón tamién el modelu de polítiques económiques, culturales y medioambientales que se van a desendolcar na realida concreta. Y pa eso ye imprescindible una cultura política bien distinta de la qu'esiste nestos momentos na sociedá que, en cuenta de fomentar pautes de negociación y alderique llibres, xira alredor del autoritarismu vertical y de la autocensura. Por eso urxe la emerxencia d'espacios de converxencia ente distintos axentes sociales y políticos pa entamar ferramientes d'aición coleutiva que permitan camudar la correlación de fuercies de tala manera que’l pueblu asturianu pase de ser l'oxetu pasivu de la política a ser el so suxetu protagonista.
Nel conceyu de Xixón, nel día 14 d’agostu.
Presentación del llibru «Escritores carlistes na lliteratura asturiana» nel ayuntamientu de Xixón
Videu d’Inaciu Iglesias presentando’l llibru
L’escritor Javier Cubero, estudiante de Ciencies Polítiques y Alministración, de 23 años, presentó’l día 24 de xunu nel ayuntamientu de Xixón la so obra «Del romanticismu al rexonalismu: escritores carlistes na lliteratura asturiana», ganadora l’añu pasáu del «Premiu Federico González-Fierro Botes d’Ensayu y Trabayos d’Investigación». El trabayu pretende realizar un estudiu de síntesis de la figura y l’obra de cuatro autor asturianos próximos al carlismu, que son Xuan María Acebal, Manuel Fernández de Castro, Enrique García-Rendueles y Fernán-Corones. Al mesmu tiempu l’analís de estos escritores ensertase nel contestu sociollingüísticu de l’Asturies de la so dómina, nel contestu políticu del conflictu ente carlistes y lliberales qu’implicaba dos proyectos de estructuración del Estáu español claramente opuestos, y nel contestu ideolóxicu del romanticismu européu y de los rexonalismos/nacionalismos de base étnica-cultural.
El llibru ta prologáu pol filosofu Lluis Xabel Álvarez, profesor de la Universidá d’Uviéu y miembru de l’Academia de la Llingua Asturiana (ALLA).
Nel actu participaron Jorge Espina, en representación de la conceyalía de Cultura Tradicional y Llingua Asturiana del Ayuntamientu, l’ensayista Inaciu Iglesias, de Trabe Ediciones, y l’autor, Javier Cubero de Vicente.
Enllazamos con dos entevistes en diarios dixitales asturianos onde Javier Cubero espón dalgunos de los conteníos del so llibru:
Vuelve EL FEDERAL
El Federal ye la publicación del Comité Executivu Federal del Partíu Carlista. Ta solamente subvencionáu polos mesmos militantes carlistes, d’ende la so absoluta independencia. Ye amás la única publicación con collaboraciones en toles llingües del Estáu español.
Calendario 2010 del Partido Carlista
