Blogia
PARTÍU CARLISTA: pola defensa de la nuesa tierra

Resclavos del carlismu

Resclavos del carlismu

 

David M. Rivas

 

Tengo’l placer de presentar el llibru de Javier Cubero “Del romanticismu al rexonalismu: escritores carlistes na lliteratura asturiana”, premiu Fierro Botas del añu pasáu y, pa mayor satisfacción, acompangáu del mio vieyu amigu Pepe Girón, heterodoxu ya incómudu profesor de la Universidá d’Uviéu. Dende la organización de L’Arribada, nesta vagamar de Xixón, recibimos con ciñu a Cubero ya’l so trabayu.

 

El carlismu ye un movimientu poco estudiáu y particularmente poco estudiáu n’Asturies. Hai profesores d’historia contemporánia que se detienen durante selmanes y selmanes docentes en episodios relativamente fugaces de la nuesa historia, como la revolución de 1934 o la constitución del INI, pero que nun dediquen unos minutos tan siquier a un movimientu que condicionó fonderamente’l ser de munchos pueblos como ye’l carlismu.

 

Pa entamar, cabe dicir que’l carlista ye’l partíu políticu más vieyu d’Europa. Con estremaes definiciones, tendencies ya escisiones, caltiénse vivu dende la década’l trenta’l sieclu XIX. Nin tan siquier el partíu conservador británicu tien tanta historia. Pa facenos una idega podemos apuntar que’l PSOE ye de 1879, la CNT de 1910, la UGT de 1888, el PNV de 1895, el PCE de 1921, ERC de 1931 ya’l PP de 1989. En segundu llugar –y asina lo escriben, por exemplu, Marx ya Engels na so “Revolución n’España”- ye un movimientu de basa popular. Y, en tercer llugar, ye un movimientu particularmente importante nes rexones al norte’l Dueru, nes que la espropiación de les tierres comunales, la llamada “desamortización civil”, pa engordar les faciendes de los terratenientes afines a la raina Cristina y a la so fía, la dempués Sabel II, punxo en pie de guerra a los campesinos. 

 

Esta circunstancia desplica que, cuando les “carlistaes” tan finando, dempués d’una tercera guerra que yá nun diera más alló d’unes cuantes escaramuces, munchos de los asturianos que fueran vieyos partidarios del primer pretendiente al tronu, Carlos María, pasáronse en pleno a los partíos republicanos federales, mui especialmente a la Izquierda Federal de Pí i Margall. Del vieyu tueru foralista, y de xuru que con munchu penoriu por parte de los montones de cures y beatos que tamién yeran de gran pesu nel carlismu primitivu, surdiera una vivificante tradición democrática que tuviera como emblema paradigmáticu al primer alcalde republicanu de Xixón, Isidro del Río. Parte de la mio mesma familia fixera esi viax ideolóxicu.

 

Mirar pal carlismu ye mirar con otru lente la historia d’Asturies. La nuesa historia, la mesma formación de la sociedá asturiana, ye daqué más qu’una revolución fracasada y la gafienta dictadura franquista y, magar que nun lo veamos con una güeyada rápida, hai vida popular fuera de les organizaciones de la Segunda Internacional. Haila –y muncho- na Primera Internacional, la bakuniniana, y tamién nel antilliberalismu carlista.

 

Hai unos cuantos años, golismiando per una llibrería de vieyo madrilana, nel barriu Salamanca, atopeme con un llibru de Vázquez de Mella. Yera’l volume quintu d’una serie de 1923 cola que les Cortes Españoles, les d’Adefonso XIII, homeaxeaben al carlista cangués. Tratábase d’una collección d’artículos y llevaba como título xenéricu el de “Rexonalismu”. Merquelu –paezme que me costara quinientes pesetes- y senteme pa miralu un pocoñín nun café. Esbillara al debalu y, de sópetu, alcontré una fras que me llegó a l’alma. Esto ye lo que dicía’l conservador Vázquez de Mella: “la primer obligación d’Asturies ye “asturianizase”. Pueblu que pierde la so orixinalidá ye pueblu dexeneráu que reniega d’él mesmu al divorciase de los sos antepasaos”. Pos bien, cuála nun sedríe la mio sospresa cuando m’alcuentro con esta cita nel empiezu d’un de los capítulos del llibru de Javier Cubero.

 

Y aquel descubrimientu llevome a pensar na “inmaculada transición”. Nes primeres ellecciones, les de 1977, nun pudieron concurrir tolos partíos. Pudieron presentase tolos d’estrema drecha, drecha, centru, socialdemocracia, socialismu y comunismu carrillista. Pero nun pudo facelo la esquierda dura (MCE, LCR, ORT, PTE). Y tampoco dengún partíu que llevara la “R” de republicanu. Nun foran llegalizaos Izquierda Republicana nin Esquerra Republicana de Catalunya, pero nin tan siquier l’Alianza Republicana Democrática Española (ARDE), que yera un partíu republicanu burgués de centrodrecha. Con eso pretendía la nueva monarquía que tol votu d’esquierda quedara nel PCE y tola memoria republicana nel PSOE.

 

Pero ye que tampoco pudo llegalizase’l Partíu Carlista. Y con eso pretendía la nueva monarquía heredera de Franco que los carlistes progresistes s’averaran al PSOE, los más cafres votaran AP y los más federalistes engromecieran les macones del PNV, qu’arrenunciara inclusive a la heredá del “lehendakari” Aguirre y aceptara una autonomía delegada ya otorgada por Xuan Carlos I. Y, de pasu, favor por favor, el carlismu quedaba derrotáu definitivamente pol xuanismu ya’l xuancarlismu.

 

Volviendo a Asturies y al llibru de Cubero –que ye lo que mos aconceya-, nun ye la primera vegada que se fala de los autores carlistes na nuesa lliteratura. Yá lo fixera hai unos años Sánchez Vicente ya un poco más sero Pablo San Martín. Y los dos dicíen, como apunta agora Cubero, que tratábase d’un movimientu políticu y lliterariu de resistencia a la uniformidá, una resistencia que lu facía, por eso precisamente, mui popular.

 

A la escontra, alfrentaes a tolo que yera diferencialidá, taba la burguesía financiera urbana –foriata toa ella- y les organizaciones obreres ya esquierdistes en xeneral, sacantes de dalgunos grupos republicanos federalistes, de dalgunes loxes masóniques y de dalgunos sindicatos anarquistes. Nun hai d’escaecer que, en 1937, cuando’l Conseyu Soberanu taba deliberando sobro qué faer, milicies del Partido Comunista de España taben asitiaes n’El Parchís p’afusilar a los conseyeros si decidíen proclamar a Asturies soberana y ruempíen cola república española.

 

El percorríu que Cubero fae pelos autores qu’elli califica como “carlistes” ye discutible. Carlista a carta cabal ye Acebal, el meyor poeta pente los clásicos na mio modesta opinión, pero yá nun diría yo tanto de “Don Manolín”, l’obispu Fernández de Castro. Evidentemente comparte con Acebal un romanticismu cuasi estremu ya una fe católico duro ya ensin resquiebres, pero nun teo yo tan clara la so afinidá carlista. Veólo más probable en García Rendueles y volve pareceme mui forzao en Fernán Coronas. Tóos ellos son tradicionalistes, antilliberales –curiosamente lo menos antilliberal qu’alcontramos nesti cuelmu ye l’obispu- pero nun queda claro –y Cubero nun ye a demostralo- la so filiación político.

 

Alcuérdome d’una viñeta humorística d’un periódicu asturianu –igual yera del mio amigu Neto pero nun lo sé- que me prestó muncho. Víense dos dirixentes del PP –pámeque Cascos y Rozada- ya unu dicía: “¿qué problema tenemos cola llingua asturiana, si tolos qu’escribieran nella yeren de dreches como nosotros?”.

 

Voi terminar. L’otru día lleía nel periódicu “El Mundo” un artículu de Joaquín Bardavío pola mor de la muerte de Carlos Hugo de Borbón y Parma. Dicía, testualmente, lo siguiente: “el reciente fallecimientu de Don Carlos Hugo de Borbón Parma supunxera la desapaición del últimu pretendiente carlista qu’enarboló esa bandera absolutista ya insurreccional que provocó tres guerres civiles y participó activamente n’una cuarta, la de 1936-1939”. Igual nada que dicir sinón fora porque Bardavío trabayó pa los servicios secretos de Franco –a les ordes del coronel San Martín- y fora un palanganeru del autoproclamáu Xuan III y, más sero, de Xuan Carlos I.

 

A la escontra, Carlos Hugo, muertu hai unes selmanes, dexó esta manda a los suyos: “que sigáis p’alantre col nuesu proyectu de llibertaes, espresión moderna de los antigos fueros”.

 

P’acabar…, una confesión. Javier Cubero fíxome una dedicatoria’l so llibru qu’igual hai unos años nun diba ser a entendela, pero güei sí: “a David M. Rivas, teóricu de la esquierda tradicionalista”. Veome bien nesa categorización. Cuasi me pide’l cuerpu glayar ¡viva’l rei!.

¿Y esta publicidad? Puedes eliminarla si quieres
¿Y esta publicidad? Puedes eliminarla si quieres

0 comentarios

¿Y esta publicidad? Puedes eliminarla si quieres