Blogia
PARTÍU CARLISTA: pola defensa de la nuesa tierra

Carta abierta a Izquierda Xunida d´Asturies

Nes caberes ellecciones xenerales la coalición Izquierda Unida presentóse énte los ciudadanos y ciudadanes con un programa ellectoral que no que cinca a l´Alministración Pública incluyía un separtáu, sol títulu La reforma de les Administraciones Públiques (numberal 4.8 del programa), nel que, pente otres, facíense les propuestes que vienen darréu:

- Reforma y racionalización de los instrumentos xurídicos de Derechu Públicu (contratos públicos, xestión presupuestaria, fiscalización y control, procedimientu alministrativu etc), col envís de posibilitar una xestión áxil nes unidaes alministratives suxetes a esti tipu de regulación xurídica y torgar la fuga indiscriminada a la estaya del Derechu priváu.

- Desaniciu del clientelismu y de la patrimonialización que de la función pública vinieron faciendo los gobiernos sucesivos, lo que supunxo que valores como la fidelidá política o personal s’antepunxeren a la capacidá profesional de los emplegaos públicos. A talu fin llendaránse nidiamente los puestos políticos y los alministrativos, acutando a los estrictamente necesarios los puestos de llibre designación, estableceráse una carrera profesional afitada nos principios de méritu y capacidá, xeneralizándose´l sistema de concursu como instrumentu de provisión de puestos.

N´Asturies, como bien conoz esi grupu parllamentariu, la política de los caberos gobiernos y del d’anguañu, empobináse xustamente nel sentíu contrariu a les propuestas ellectorales que caltién el programa de Izquierda Unida. Per un lláu, la fuga del Derechu Públicu al traviés de métodos y sistemas de xestión privada ye cada vegada más abultada y masiva (la riestra d´empreses mercantiles creaes polos Gobiernos d´izquierdes pa baltiar los principios d´igualdá, publicidá y llibre concurrencia na escoyeta del personal y na contración d´obres, bienes y servicios, yá ye tan llarga que s´asemeya a la de los reis godos) y, pel otru, el clientelismu llaboral ye´l sistema dominante pa la provisión de puestos n´Alministración asturiana.

Nesti sen, na cabera rellación de puestos de trabayu del personal funcionariu espublizada’l 16 de mayu, atópense un total de 2.086 puestos singularizáos, ye decir, d´ascensu na carrera profesional o de nivel superior a los puestos d´entrada o puestos base, de los que 550 son provistos pel “sistema del deu” o de la confianza política, lo que supón el 26,36 por cientu de los puestos d´ascensu pal personal funcionariu.
Con estos porcentaxes, ¿pue dicise que la llibre designación ye, como esixe la llei –y propón Izquierda Unida nel so programa- un sistema exceicional n´Alminsitración del Principáu d´Asturies?

Pero l´asuntu faise bastante más crudu y sangrín porque tien qu´amestase que la llegalidá tamién s´esfraya colos puestos de trabayu a cubrir per concursu de méritos, porque los concursos nun se convoquen nos plazos llegales. La llei diz que los puestos vacantes nun puen ocupase provisionalmente más d´un añu y que tienen que sacase a concursu nesi plazu, pero na práutica les convocatories nun se facen y los nomamientos provisionales o en comisión de servicios duren dellos años. Cómo esto nomamientos provisionales fácense tamién pela “vía dixital”, alcontrámonos “de facto” con una carrera profesional puesta al aviesu: el concursu de méritos ye la exceición y la llibre designación la regla xeneral.

Pa remachar esti sistema dafechamente clientelar y da-y “patente de corsu”, el “anteproyectu de llei de Función Pública” qu´el Gobiernu asturianu ta acabante de espardir, pretende imponer un mecanismu de concursu específicu pa la provisión de tolos puestos de trabayu de carrera, ensin exceición dalguna, nel que los méritos subordínense al resultáu de la presentación d´una memoria y/o d´entrevistes colos candidatos cuando, fasta agora, esti concursu específicu yera un procedimientu estraordinariu, utilizáu pola Alministración precisamente naquellos casos nos que se quería privilexar a un determináu candidatu. Ta perclaro que los que tarán nes meyores condiciones pa facer esa memoria de la plaza o pa defendese na entrevista sedrán aquellos que yá la ocupen en comisión de servicios, ye dicir, los nombráos a déu, polo qu´el concursu volveríase asina un procedimientu dafechamente empobináu a conceder los puestos d´ascensu a los funcionarios que cuenten cola confianza política o personal del gobiernu.

Si a too ello amestamos la imposición unilateral de la téunica xerencial privada de la “evaluación del desempeñu”, empobinada a argayar dafechu la igualdá salarial y les condiciones imprescindibles de imparcialidá y neutralidá política, en cuantes que el salariu y la permanencia en puestos algamaos por concursu de méritos dependerán dafechu de los informes de funcionarios nombraos “a déu” polos partíos gobernantes, nun ye dexaxerao concluyir que lo ta en xuegu n´Asturias ye la esencia mesma del sistema constitucional de Función Pública.

Énte esti panorama, los roblantes esixen al grupu parllamentariu d´Izquierda Xunida d´Asturies que cumpla bonalmente col programa y compromisu ellectoral y adopte, cola urxencia que requier el casu, les iniciatives polítiques y llexislatives afayadizes empobinaes a qu´una Alministrtación Pública oxetiva, imparcial y al serviciu del interés xeneral seya posible n´Asturies.

Uviéu, 15 de xineru de 2009

La Xunta Xestora del Conceyu por Otra Función Pública n´Asturies
¿Y esta publicidad? Puedes eliminarla si quieres
¿Y esta publicidad? Puedes eliminarla si quieres

0 comentarios

¿Y esta publicidad? Puedes eliminarla si quieres