El CAO convoca una concentración pola oficialidá delantre la Xunta Xeneral

El próximu llunes 14 d’abril, los grupos parllamentarios representaos na Xunta Xeneral van aconceyar pa tratar sobre la reforma del Estatutu d’Autonomía d’Asturies y el Conceyu Abiertu pola Oficialidá (plataforma na que participa el Partíu Carlista d’Asturies) convoca una concentración al pensar qu’“esta nueva reforma ye posiblemente la última oportunidá de poder cuntar, por fin, con un estatutu que s’axuste a la nuesa realidá cultural y llingüística, y que reconoza los mesmos derechos a tolos ciudadanos, falen la llingua que falen”.

Agora, sigue’l comunicáu del CAO, “vuelve abrise la oportunidá de tornar esta situación. Esta reforma del Estatutu d’Autonomía tien que recoyer la única reivindicación ciudadana n’Asturies que se vien manteniendo constante nos últimos trenta años. Nun podemos dexar que por culpa d’intereses partidistes irresponsables condenen a muerte a una llingua que pertenez al pueblu asturianu dende va más de mil años”.

El CAO convida a tolos asturianos a participar el próximu llunes 14 d’abril a les 9:30 cabo la Xunta Xeneral y embaxo’l lema “¡Na reforma l’Estatutu, L’Asturianu Llingua Oficial!”.