Un mes paralizada l´Alministración de Xusticia n´Asturies

Xurde Blanco Puente. Secretariu,
pola Xunta Xunta Direutiva del Aconceyamientu de Xuristes pol Asturianu. 

La fuelga tien l’orixe nel desdexamientu d’un principiu que nuna Conseyería de Xusticia ya Igualdá (y de la Presidencia tamién, polo que-y toca) teníen que respetar dafechu: a trabayu igual, salariu igual. Porque ye’l casu que los funcionarios de Xusticia cobren n’Asturies pente 200 y 500 euros al mes menos que los sos colegues catalanes, vascos, valencianos, gallegos… cántabros.

¿Por qué?. La razón tien hestoria. Va p’añu y mediu entamábase’l procesu de tresferencies en materia de Xusticia al Principáu d’Asturies. Mes p’arriba o p’abaxo, al empar qu’en Cantabria, pero ellí perfecháronse cola entrada del añu y equí namás se formalizaron les tresferencies de los medios materiales y del personal llaboral. ¿Y por qué non les del personal funcionariu?. Dende’l gobiernu d’Asturies nadie da razón del retrasu y nós nun vamos a garantizar qué ye lo que pasa per cabeces tan estremaes de la nuesa, pero ye´l casu que les diferencies salariales mentaes prodúcense porque los funcionarios de les Comunidaes Autónomes cobren más que los de l’Alministración Central y, magar qu’en Xusticia ríxe un estatutu especial, avézase, coles tresferencies, a equipara-yos el sueldu col de los funcionarios de la so mesma categoría profesional na Comunidá Autónoma. Por eso en Cantabria yá cobren 350 euros más al mes.

Con pates y rincha ¿qué sedrá?. A nós paeznos que burru: si a los funcionarios de Xusticia n’Asturies-yos suben el sueldu enantes de les tresferencies, el gobiernu d’equí ná-yos tendrá que subir dempués, y, al aviesu, si vienen ensin les perres na mano hai qu’apurriles equí. Al cabu, que l’estropiciu podía esplicase mui guapamente asina: por aquello de quien va pagar (o meyor dicho, de qué bolsu se van sacar, porque lo que ye pagar vamos pagalo toos, de toes toes) los 200 euros (los nuesos funcionarios acordies cola probeza xeneral d’Asturies confórmense colo menos), el gobiernu socialista central y el gobiernu socialista asturianu, entrambos los dos gobiernos del reinu d’España, tienen paralizada l’Alministración de Xusticia por un mes, lo que caiga y la cola que traerá.

¿Qué dilixencies ficieron o faen, pa cortar pela freba esta llocura, la sra. Ramos y el sr. Cabaleiro personaxes tan sollertes y dispuestos siempres pa reprimir l’emplegu de la llingua asturiana aú quiera que-yos asitien la poltrona?. ¿Sedrá porque tienen que tar xixilantes –nun seya qu’a los funcionarios se-yos ocurra, por exemplu, pidir un permisu pa sometese a “una intervención cardiolóxica nel Hospital Xeneral d’Asturies”, asina, n’asturianu ná menos, faltaría más, fasta ehí podíemos llegar- polo que nun-yos vagó averáse a Cantabria a deprender como se resuelve democráticamente un conflictu que n’Asturies tien paralizada a l’Alministración de Xusticia, envelenaos a los sos funcionarios, esmolecíos a xueces y secretarios y qu’a mediu y llargu plazu va costamos a toos y caún de los asturianos más de lo qu’imaxinamos?.

¿A quién mataríamos n ‘Asturies pa merecer esto?.