Blogia
PARTÍU CARLISTA: pola defensa de la nuesa tierra

ACEBAL Y EL CARLISMU

ACEBAL Y EL CARLISMU

La Voz de Asturias.

* Lluís Xabel Álvarez

(Catedráticu de Filosofía y Estética)

5/4/2006

El sábadu 1 d’Abril xubimos unos cuantos al cementeriu carbayón. Nun yera por siguir la guía de los mui oviedinos, esto ye, “nun vos preocupar que pase lo que pase acabamos en San Esteban”. Esta vegada queríamos facer esi homenaxe al poeta Xuan María Acebal (1815-1895) que tien pinta de dir afitándose d’añu n’añu. A min tocóme lleer un fragmentu del poema “La fonte de Fascura”: ‘Qué suave qu’ella cuerre! / ¡Qué llimpia surte l’agua!’.

Dempués el gaiteru Marcos Fernández Verdeja tocó un aire solemne y l’estudiante Javier Cubero dio un discursu pequeñu y exautu so los raigaños carlistes del poeta. Bon tiempu en cielu azul y les tumbes cercanes del poeta mierense Teodoro Cuesta y de Eduardo Martínez Torner, el gran musicólogu. Hai que saber munches coses nesta vida pero una d’elles ye que’l poeta Acebal quería muncho al xernu, el caderalgu Guillermo Estrada y qu’esti yera  un personaxe del bandu carlista que cuando la guerra d’entós tuvo cargos nel gobiernu del Pretendiente. Son coses antigües pero non tanto si se sigue la llucha dinástica de la familia carlista tal como apaez nel llibru ‘Don Javier, una vida al servicio de la libertad”, con prólogu de Carlos Hugo de Borbón Parma y escritu pola so hermana María Teresa xunto con Joseph Carles Clemente y Joaquín Cubero Sánchez.

¿Acuérdense de Montejurra y del desfaimientu del carlismu democráticu y autonomista na Santa Transición? Yo acuérdome de ñicios sesenteros de la mio adolescencia, cuando'l mio amigu artista J.Serrano dibuxaba pa mín les nobles tiestes tocaes con boina de la panoplia carlista. Yo ablucaba d’aquella, dao que los Serrano son de Medina del Campo – a desmano de la tierra vasconavarra, ¿non? Y si llego a tener un datu que la mitoloxía española oscurez a posta, abluco tovía más: D.Javier de Borbón y Parma anduvo pel campu d’esterminiu de Dachau, en 1945, y non d’invitáu sinon en calidá de deteníu pola organización criminal  SS. ¿Motivu? Nada, minucies: ser próximu y pariente de los austríacos invadíos y executaos por Hitler; o tamién: dicí-y a Franco a la cara qué’l carlismu nun sofitaría, dempués de la Guerra Civil, un gobiernu de corte nazi-fascista contrariu a la reconciliación, la democracia y los fueros territoriales. Queda en tinteru: hai que recuperar pala ciencia histórica lo que la democracia española débe-y daveres al carlismu.

 

¿Y esta publicidad? Puedes eliminarla si quieres
¿Y esta publicidad? Puedes eliminarla si quieres

0 comentarios

¿Y esta publicidad? Puedes eliminarla si quieres