Javier Cubero faise col II Premiu Fierro-Botas por un trabayu sobre los escritores carlistes na lliteratura asturiana

 

Javier Cubero de Vicente ye’l ganador de la segunda edición del Premiu d’ensayu y trabayos d’investigación Fierro Botas, por "Del romanticismu al rexonalismu: escritores carlistes na lliteratura asturiana", un trabayu nel repasa la biografía de los autores carlistes de la dómina estudiada. D’esti estudiu, presentáu col nomatu de Xuan Castiñeiro, el xuráu valoró especialmente la visión de conxuntu que plantega la obra sobre esti periodu y esta ideoloxía en concreto.El gallardón convócalu la Conceyalía de Cooperación, Cultura Tradicional y Política Llingüística de Xixón y ta dotáu con 4.000 euros y la publicación de la obra.

 

En declaraciones a Asturnews, Javier Cubero dixo tar "mui contentu y mui agradecíu al xuráu por consider al mio trabayu merecedor del premiu". Amás animó a otros investigadores "a siguir esti camín de la investigación hestórica", solliñando especialmente "a la xente mozo, estudiantes d’hestoria", pues según Cubero esisten tovía "grandes furacos del nuesu pasáu por estudiar".

 

El xuráu formáronlu pa esta edición Roberto Colunga (presidente), en representación de la conceyalía de Cultura Tradicional y Llingua Asturiana, Jaime González-Fierro, filologu, profesor de Secundaria y representante de la familia González Fierro, Miguel Ramos Corrada, Vicepresidente de l’Academia de la Llingua Asturiana, Rafael Rodríguez Valdés, historiador y ganador del premiu na so edición primera, Jesús Ángel Fernández, filólogu y teólogu, xesuita miembru de la comunidá del Natahoyo a la que pertenecía Federico Fierro, Ana Vanessa Gutiérrez, escritora, Beatriz Rodríguez Viado, directora del semanariu Les Noticies, Humberto Gonzali, escritor y xestor cultural, miembru de la Xunta Rectora de la FMCEyUP del Ayuntamientu de Xixón y miembru de númberu del RIDEA, y María Xosé Rodríguez, responsable de la Oficina Municipal de la Llingua de la FMCEyUP del Ayuntamientu de Xixón, actuando como secretaria del tribunal.