Blogia
PARTÍU CARLISTA: pola defensa de la nuesa tierra

Crónica de la manifestación antifacista de Xixón, 17 Payares

Crónica de la manifestación antifacista de Xixón, 17 Payares La manifestación taba anunciada a les 18:30 hores de la plaza del Humedal. A eses hores unes 700 persones esperaben nes aceres a que la policia cortara el tráficu y pudieren desplegase les pancartes. Na de cabecera podía leese: "El nuestru meyor homenaxe ye siguir cola llucha" xunto a una pintura cola silueta de Carlos, antifacista asesinau en Madrí fae una selmana, y taba firmada pola Coordinadora Antifacista d'Asturies. Trés esta otra pancarta recordaba: "Convivencia e igualdá. Asturies Antirracista".

Dende la furgoneta qu´acompañó a la manifestación recordose el caracter pacífico de la convocatoria y la necesidá de no caer en posibles provocaciones facistes, policiales o non, durante'l recorriu de la marcha. También cuntaronse les noticies que dende Madrid llegaben de la concentración antifacista que dende les 16:30 hores reunió a miles de persones na puerta del Sol

A les 18:45 entamó a caleyar la manifestación.

A les 19:00 hores la manifestación trescurria por la cai Marques de San Esteban, más de 1000 persones acompañaben la marcha. Númberoses pegadielles antifacistes onde con semeyes de Franco y el rey podia lleese "La dictaura continua" adornaben les parees y marquesines.

A les 19:25 la manifestación llegó a la plaza del Plaza'l Parchis. Ellí taba dispuesta la megafonía pa les llectures.

Los convocantes estimen n'esos momentos n'unos 1200 los participantes na convocatoria.

Pa finar leyeronsé dos textos, unu en memoría de Carlos y l´otru el comunicau de los convocantes, y fizose un llamamientu a la solidaridá colos compañeros de la Coordinadora Antifacista de Madrid pola situación qu'atraviesan trés la illegalización de la convocatoria del 24 de Payares. Dempués emplazose a la espicha y actividaes que siguian na casa Sindical de Xixón.



COMUNICAU:

Contra'l facismu d'ayeri y güei, Llucha con memoria

Convocamos esta manifestación del 17 Payares, baxo'l llema: "Contra'l facismu d'ayeri y güei, lulcha con memoria" y, güei como ayeri, los facistes tornaron a matar, renembrandonos que siguín esistiendo nes cais e istituciones, arramplandonos a un compañeru.

El pasau domingu, 11 de Payares, el partiu d'ultra-drecha, Democracia Nacional, convocó una manifestación contra la inmigración nel barriu d'Usera, distritu obreru y popular de Madrí que munchos inmigrantes escoyeron como agospiu. Delegación de Gobiernu autorizó la marcha asi tou del ampliu hestorial delictivu de dellos de los miembros de Democracia Nacional y del carauter xenófobu de la convocatoria.

Carlos dirixíase xunta compañeros y compañeres antifacistas a amuesar la so solidaridá pa colos vecinos del barriu d'Usera y manifestar la so refuga col facismu y el racismu. Nun vagón de metro, al aportar a la estación de Legazpi, un simpatizante de Democracia Nacional, militar de profesión, asestó-y una puñalada nel corazón que-y causó la muerte. Carlos tenía 16 años de edá.

Nós, antifacistes d'Asturies, siguiremos col so exemplu y llucha, que ye la nuesa:

- Lluchamos contra la desmemoria y l'escaezu. Contra una llei de Memoria Hestórica, criada pol PSOE y sofitada por IU, que reedita los pautos de silenciu de la "Transición Democrática" asolviendo a los facistes de les consecuencies del réxime qu'emponieron nel Estau español ente 1936 y 1975; torgando la erecha de les víctimes la dictadura; consagrando'l lladrociniu, la medrana y muertes de les que se beneficiaren empresarios, políticos y funcionarios facistes convertíos n'enfluentes demócrates.

- Lluchamos contra'l racismu. Contra l'aumentu de la xenofobia na sociedá asturiana, inocente a les campañes de criminalización de los coleutivos d'inmigrantes que dende instituciones públiques y medios de comunicación tán llanzandose. Contra les agresiones a inmigrantes de bandes d'estrema drecha y bandes de policies.

- Lluchamos contra'l facismu y los facistes. Espresando la nuesa refuga pa coles idegues y actitudes coles que los grupos d'ultra-drecha qu'operen n'Asturies, como Democracia Nacional, tentan d'atrayer a la mocedá Les mesmes idegues y actitudes qu'un grupu de militares emponieron demientres 40 años a los asturianos y asturianes depués de matar a los nuesos pás y güelos.

- Lluchamos contra la represión, que ye tamién impunidá pal facismu caleyeru, demandando el desdexamientu, cuando non conseñamientu, de Delegación de Gobiernu n'Asturies énte l'aumentu de la actividá organizada d'estrema-drecha en estremaes ciudaes asturianes.

Pa finar, a los que tentais de robanos el pasau y presente, a los que mos robasteis a Carlos, recordavos que mos atopareis siempre a la escontra como n'otres ocasiones, sofitando a los inmigrantes, los gais y llesbianes, los obreros, los estremaos, los diversos. Taremos ellí anque Antonio Trevín (FSA) nos quiera lloñe o enzarraos, anque unvie a la Guardia Civil a cutirnos como'n Cangues d'Onís en 2005, anque detenga a 22 compañeros y compañeres y quier xuzgar a 19 por tentar d'impidir que Democracia Nacional avociferaren, énte'l rechazu de too un pueblu, conseñes xenófobes. Taremos ellí pa participar de la realidá, pa impidir les mentires y engañifes, pa que muertes como la de Carlos nun seyan simplificaes por los medios de comunicación y presentaes como "pelees de bandes". Foi un asesinatu ideolóxicu y desiximos qu'asína seya tratau. Nun ha haber impunidá, conseñamientu o silenciu.

Nun podemos nin sabemos escaecer a nengún compañeru/a. Nin enantes nin agora, nin ayeri nin güei. Faeremos prevaler la nuesa memoria coleutiva escontra les memories de diseñu, escontra los escaezos mayúsculos. Carlos, lluchador antifacista, presente.

¡¡¡Non al Nazi-Fascismu, non al Racismu, non a la Xenofobia!!! ¡¡¡Absolución de los 22 antifacistes de Cangues!!! ¡¡¡Por una llei de Memoria Hestórica qu'arrepare a les víctimes!!! ¡¡¡Güei como ayeri. Nun pasarán!!!
¿Y esta publicidad? Puedes eliminarla si quieres
¿Y esta publicidad? Puedes eliminarla si quieres

0 comentarios

¿Y esta publicidad? Puedes eliminarla si quieres