EL CARLISMU N'ASTURIES NEL SIEGLU XIX

¿Qué foi'l Carlismu?

 Al Carlismu puen dáse-y munches interpretaciones. Foi un movimientu qu'abarcó más de cien años. Como consecuencia d'ello, la so realidá resultó plural y rica. El carlismu tien esplicaciones del calter relixosu (católicos enfrentaos a les medíes anticlericales y al desaniciu de les órdenes relixoses decretaes polos gobiernos lliberales); argumentos sociales (nobleza, cleru y campesináu enfrente la "revolución burguesa"); económicos (propietarios o arrendatarios perxudicaos pola desamortización y pola nueva política fiscal); de supervivencia (campesinos afectaos pola privatización de los montes vecinales); sociolóxicos (partidarios de caltener les formes de vida tradicionales enfrente les treformaciones sociales); coyunturales (democratización encontra'l centralismu y el sistema caciquil de la restauración); pero tamién; y esta última esplicación particulariza toles anteriores; argumentos nacionales y políticos. Y por eso formó parte del formientu nel que nacieron los protonacionalismos en Cataluña, País Vascu y Navarra, Aragón o Asturies.

  Inaciu Iglesias. Historia del nacionalismu asturianu. Ámbitu 

 

La base social del Carlismu n'Asturies 

N’Asturies algamó nel sieglu XIX una significación abondo valoratible, teniendo les guerres carlistes, por exemplu, una importancia bastante notable. Parte de la sociedá rural asturiana de la dómina (que yera la mayoría), especialmente de les zones de montaña, los artesanos d’Uviéu, parte de la élite nobiliaria tradicionalista, y, principalmente, la Ilesia Asturiana, tuvieron del llau carlista, faciendo d’elli un movimientu enforma presente na vida sociopolítica.

 Pablo San Martín, Asturianismu políticu (1790-1936), Ediciones Trabe 

 

Les Guerres Carlistes n'Asturies 

El pasu del antiguu réxime a un sistema constitucional nun se fixo n’España hasta mediados del sieglu diecinueve (a partir de 1833). Tres aspectos d’esti cambiu enfrentaron abiertamente a los tradicionalistes colos distintos gobiernos lliberales: l’anticlericalismu (decretos de desaniciu d’órdenes relixoses), la política económica (desamortizaciones y nuevu sistema fiscal) y el centralismu xacobín (simbolizáu na abolición de les instituciones tradicionales d’autogobiernu, como la Xunta Xeneral asturiana).La invasión militar de Napoleón aportó con ella una serie de contradicciones que quedaron por resolver. Precipitó l’abolición del antiguu réxime y supunxo l’aparición en política del nacionalismu español. (...)En terminando la guerra yá nada podía siguir igual (...) les posiciones básiques foron dos: la de los lliberales, o partidarios de copiar n’España’l sistema francés, y la de los conservadores, o partidarios de caltener la situación anterior y nun facer cambios.Enfrente d’estes dos posiciones taba la que podríemos definir como la de los tradicionalistes. Los tradicionalistes, que después pasaríen a llamase carlistes, proponíen afondar nes instituciones democrátiques antigües y na tradición católica y europea p’alcontrar ellí los modelos colos que facer esi cambiu políticu.Pa poder empezar a falar de “carlismu” propiamente dichu, tenemos qu’esperar a la fin del reináu de Fernando VII. A la so muerte, empezó una pelea dinástica pa decidir la so sucesión. Los dos “candidatos” yeren Doña Isabel, fía del Rei, y Don Carlos, hermanu del mesmu. Los tradicionalistes entendieron que con Don Carlos diben poder desarrollar les sos idees polítiques. Los lliberales, d’otru llau, tomaron partíu por Doña Isabel. (...)

 Esta primer guerra carlista, que terminó en derrota, empezó en 1833 y llegó hasta 1840. Pero en 1834, yá dende’l tronu, Isabel II promulgó l’Estatutu Real y instauró, con toles consecuencies, un réxime lliberal. Esi mesmu añu abolióse la Xunta Xeneral asturiana, institución con más de 500 años d’esistencia, que se sustituyó por una diputación provincial d’inspiración, normes de funcionamientu y competencies, claramente centralistes. En febreru d’esi mesmu añu, les autoridaes gubernamentales publicaron una llista colos nomes de los asturianos que teníen que se desterrar poles sos idees. Había profesores d’universidá, estudiantes, clérigos, campesinos, artesanos y pofesionales lliberales. Munchos escaparon del país y otros foron a engrosar les files guerrilleres. Como “guinda” de toes eses midides, a les poques semanes, Asturies desapareció oficialmente como entidá histórica y el so territoriu pasó a denominase, fríamente, como’l de la “Provincia d’Uviéu”.En 1835, la desamortización y el decretu de supresión de conventos fortalecieron a los grupos carlistes. Estos grupos o célules dispersos pel país contaben, amás, con un apoyu cada vuelta mayor de los campesinos que se víen perxudicaos pola nueva política fiscal. Yera d’esperar. Los campesinos quedaron escluyíos de les desamortizaciones, sufrieron l’alza de les rentes impuestes polos nuevos propietarios y foron los más afectaos pola “lleva de quintes” o serviciu militar obligatoriu.Les guerrilles carlistes algamaron les mayores victories nel veranu y na seronda de 1836. Tomaron Uviéu y controlaron, como puntos importantes, Mieres, Sama, La Pola Siero, Xixón y Avilés. De toles maneres, esti control nun foi prollongáu nel tiempu y la guerra terminó en 1840, n’Astuires y n’España, col llamáu “abrazu de Vergara”.

 Depués d’esta derrota l’ideariu carlista esperimentó una tresformación. Apartóse definitivamente de cualquier rescualdu d’alcordanza absolutista y enfotóse cada vez más na descentralización del poder lexislativu.A partir del añu 1868, col empiezu del llamáu “seseniu democráticu”, 1868-1874, incluyendo la 1ª República, el movimientu carlista reverdeció. Los carlistes abandonaron la vía insureccional y, en decantándose por sistema parlamentariu, consiguieron dos coses: un apoyu electoral importante y l’averamientu de bien de sectores católicos.

 Nun manifiestu de 1869, el pretendiente Carlos VII propunxo otorgar una “llei fundamental” que permitiera’l caltenamientu de la tradición relixosa, l’adopción de midides de protección económica a les clases más desfavorecíes (básicamente’l campesináu) y, más qu’otra cosa, la descentralización política cola recuperación de les instituciones tradicionales d’autogobiernu. Exactamente lo contrario de lo que dicía la constitución española de 1869.Nesti periodu del seseniu democráticu los carlistes presentáronse a tres elecciones: 1869, 1871 y 1872. Nes dos primeres, el Partíu Carlista llegó a sacar hasta 79 diputaos, 3 por Asturies. Pero les terceres, les elecciones de abril de 1872, resultaron tan amañaes que n’agostu d’esi añu triunfó la corriente abstencionista y empezaron otra vuelta les actividaes guerrilleres.

 Esta segunda guerra carlista (que se suel conocer como la tercera, polos llevantamientos en Cataluña de 1846 a 1849) duró del 1872 al 1876. Cuatro años. Esta vez l’alzamientu guerrilleru nun foi tan esitosu como’l primeru, anque llegaron a controlar villes tan importantes como Sama, la Felguera, la Pola Llaviana, la Pola Llena, l’Infiestu, Lluarca, Grao o Tinéu. La guerra terminó col esiliu del pretendiente, D. Carlos , en 1876, y la proclamación d’Alfonso XII como Rei d’España. Foi la llamada “restauración borbónica”.

 Inaciu Iglesias. Retratos. Ámbitu 

 

La Restauración

Depués d’esta segunda (o tercer) derrota militar, reavivóse la polémica ente los partidarios de la vía insurreccional y los que queríen integrase na vida parlamentaria. Hubo divisiones y el carlismu perdió fuercia. Munchos llegaron a integrase na Unión Católica de Alejandro Pidal Mon y terminaron desembarcando nel Partíu Conservador.

 Inaciu Iglesias. Retratos. Ámbitu 

 

 

 Depués de la guerra de Carlos VII (1872-1876) el carlismu debatíase ente dos corrientes internes, una la llamada “integrista” o católica, na que militaben bona parte de los nuevos simpatizantes del carlismu, especialmente los llegaos al rodiu de 1868 desde’l catolicismu burgués y desde’l moderantismu lliberal, y otra la “carlista”. La primera ye la que triunfa a partir de 1879, lliderada por Cándido Nocedal, l’estudiosu de Xovellanos. Pero en 1888, depués d’un intentu de cambiu promovíu pol propiu Carlos de Borbón (y nel que participa Guillermo Estrada), la llinia “carlista” llogra echar a la “católica”

Antón García, “Prólogu”, en: Xuan María Acebal, Obra poética, Uviéu, Alvízoras Llibros 

Uviéu yera’l centru alministrativu’l país, con una presencia menor de gran industria que Xixón, pero concentrando un númeru persignificatible de capes medies lliberales, funcionariáu y artesanos (mayoritariamente carlistes). Pero yera, amás, el centru universitariu d’Asturies, que constituyía un peranimáu centru d’alderique políticu nel que la mayoría los profesores repartíense ente republicanos y carlistes. Asina, a entamos los ochenta, cuando Posada entra na Universidá, el claustru taba formáu por: cuatru carlistes (V. Díaz, M. Barrio Mier, J. Fernández y Guillermo Estrada, cabezaleru’l partíu y xenru d’Acebal) y por seis republicanos.

Pablo San Martín, Asturianismu políticu (1790-1936), Ediciones Trabe 

Nesos años hai un debate n’Asturies al rodiu del rexonalismu nel que participen los carlistes y los republicanos. En 1886, por exemplu, la Revista de Asturias reseña un artículu aparecíu enantes n’El Carbayon col t´tulu “El regionalismo y los partidos políticos”, onde analizaben les causes del averamientu ente tradicionalistes y republicanos vista la debilidá de los partíos dinásticos.

Antón García, “Prólogu”, en: Xuan María Acebal, Obra poética, Uviéu, Alvízoras Llibros 

 

Presencia na vida sociopolítica asturiana a finales del sieglu XIX

Tres fechos ilustrativos d’ello pueden ser:

A)    la importante prensa carlista: Tradición, fundáu en 1857, La Unidad, 1869, El Auseva, 1885, La Cruz de la Victoria, 1886, La Victoria de la Cruz, 1888, Las Libertades, 1893 por primer vegada (tendría varies dómines: 1895, 99, 1903, 05, 08), El Pensamiento de Asturias, 1899, El Amigo del pobre, 1908, El Principado, 1909, La Verdad, 1912, Boletín Jaimista, 1922, Tradición Astur, 1934;

B)    los abondos Círculos Carlistes: p. ex., nel caberu terciu’l s. XIX habíalos n’Uviéu (C. Cuadonga), Villaviciosa, Llena, Xixón, Llaviana, Avilés, Castropol, Morcín, Salas, Mieres, Lluarca, Samartín del Rei Aureliu, Proaza, Carreñu, Llanera, Ayer, Colunga, Balmonte Miranda, Cabrales, La Pola Sieru, Candamu, Les Regueres y Llangréu;

C)    los bonos resultaos electorales a tolos niveles (a Cortes, p. ex. ganaron l’acta –en solitariu– en diez ocasiones) cuasi toles vegaes que se presentaren y aceptaren el xuegu electoral. Nel sieglu XX la so presencia electoral centraráse nes municipales.

Pablo San Martín, Asturianismu políticu (1790-1936), Ediciones Trabe 

 

 

Asturianismu cultural

Hai qu’alcordase que’l carlismu ye una ideoloxía que caractericemos comu federalista-foral, que nun se pue entender si nun ye en relación a (...) les llamaes “cuestiones forales” (solo cola cuestión dinástica o relixosa nun habría carlismu). (...) Pero’l fechu más significatible sobre’l carlismu asturianu ye la so fonda relación col movimientu asturianista cultural al través de la Ilesia. El cleru asturianu, tanto rural comu, por exemplu, del Cabildu Catedraliciu Uvieín [131], sedrá carlista; y, dotramiente, esa mesma Ilesia –carlista- sedrá la que desendolque un intensu movimientu lliterariu y cultural alredor de la llingua [132]. Dende les décades finales del sieglu XIX la Ilesia Asturiana, gracies a l’enfotu d’asturianistes comu l’obispu Manuel Fernández de Castro, entamó a usar la llingua asturiana, xenerando una lliteratura relixosa y didáctica, y, postreramente, un teatru. Amás, l’asturianismu lliterariu cuenta con autores comu Xuan María Acebal, nos que la poesía, la relixón y la militancia carlista xúnense nuna concepción fuerista y asturianista de la vida. Elli, xenru del cabezaleru carlista Guillermo Estrada Villaverde, ye exemplu de la xuntanza triple ente la relixón, el carlismu políticu y l’asturianismu cultural, más si tenemos en cuenta que foi elli quien coles sos traducciones s’enfotó en demostrar les posibilidaes del asturianu: la so concepción del Estáu y la política nun yera una militancia carlista xeneralista aplicada a Asturies, yera una actitú vital d’Asturianismu canalizada políticamente nel Carlismu.

[131] Nel caberu cuartu sieglu cuasi tol cleru uvieín yera carlista.

[132] RODRÍGUEZ ALONSO, A., “Ilesia Asturiana y Llingua. Un místicu redescubrimientu, el Padre Galo”, en Vv. Aa., Alcordanza del Padre Galo, Ed. Serviciu de Publicaciones del Principáu d’Asturies, Uviéu, 1993.

Pablo San Martín, Asturianismu políticu (1790-1936), Ediciones Trabe 

Persones mui destacaes dientro del movimientu asturianista simpatizaran abiertamente o militaran nel Partíu Carlista. Xente como Guillermo Estrada Villaverde, xefe del partíu n’Asturies en distintes ocasiones, el poeta Xuan María Acebal, l’obispu y traductor Manuel Fernández de Castro o, n’época más moderna, l’antólogu y escritor Enrique García Rendueles vivieron l’asturianismu dende la opción carlista.

Inaciu Iglesias. Retratos. Ámbitu 

Polo apuntao y lloñe d’agotar la nómina d’autores militantes o simpatizantes, pue vese la importancia cultural del carlismu n’Asturies, tanto pola cálida indiscutible de los creadores qu’abrazaben esa causa (con Xuan María Acebal y Fernández Castro a la cabeza), comu pola so actividá comu traductores o difusores de la lliteratura n’asturiano. Sicasí, el carlismu ye’l movimientu políticu del XIX que menos conocemos no tocante a Asturies. Polo regular tien la mala prensa qu’enriba d’elli echaron los historiadores lliberales, vencedores de los sucesivos enfrentamientos qu’aquellos promovieron nel sieglu XIX.

Antón García, “Prólogu”, en: Xuan María Acebal, Obra poética, Uviéu, Alvízoras Llibros