Blogia
PARTÍU CARLISTA: pola defensa de la nuesa tierra

Pola soberanía alimentaria. Escontra la criminalización de la protesta social.

Pola soberanía alimentaria. Escontra la criminalización de la protesta social.

Del mediuambiente al mieualambiente
Inseguridá alimentaria
Anque tamos avezaes a sentir lo contrario, nun ye la economía la que se mundializa sinón que ye’l mundu’l que se economiza, tornando tolos valores –materiales y simbólicos– al preciu’l mercau. Los restauranes de comida basoria son más qu’un símbolu d’esti procesu, ya que les sos práutiques tan estendíes per tol sistema agroalimentariu.
L’alimentación y la tierra dexen de formar parte de les nueses vides, y van reducise a un meru recursu. Les semilles xenéticamente modificaes, los pesticides o los antibióticos y tranquilizantes pa’l ganáu remplazen a les práutiques tradicionales y a la producción llocal. L’alimentación dexa de ser un drechu pa ser un riesgu, una fonte d’inseguridá. El mediuambiente ye sustituíu pol mieu al ambiente. Les presones que trabayen la tierra son represaliaes por reivindicar los sos drechos, que son los nuesos.
Desixir la soberanía alimentaria ye la única alternativa al esmantelamientu del mundu rural –incluyíu l’asturianu–, asina como la garantía de la supervivencia de millones de persones nel mundu.

Lo que la sonrisa escuende
McDonalización del control social

Pero na continuidá d’esti modelu tamién son fundamentales los mecanismos de control. Per un llau, tamos sistemáticamente bombardeaes pola publicidá, na que neños y neñes son munches vegaes el reclamu. La so imaxe ye perimportante pa potenciar un consumu que nun correspuende coles nueses necesidaes. Poro, quienes denunciamos la McBasoria somos multaes por repartir unos panfletos o pone-yos unes pegadielles.
Per otru llau, ye necesario afitar el control de la mano d’obra y de la clientela. La precariedá y los mecanismos de disciplinamientu indireutu son parte del secretu. Les trabayaores nun tienen drechos sindicales, mientres que les consumidores acaben siendo mano d’obra gratuita: recoyida de les bandexes al finar la consumición; seleición de los productos nos supermercaos, etc.


Comida basoria, trabayu basoria, vida basoria
L’Estau de Malestar

L’Estáu xuega un papel cimeru a la hora de sofitar esti modelu. Énte los problemes sociales que vivimos n’Asturies, l’Estáu empéñase n’amenorgar la xusticia al drechu, el drechu a un conxuntu de normes y éstes a un llistáu de sanciones. La despolitización ye l’oxetivu d’esta estratexa. Asina, paez que nun somos condenaes por oponenos a la comida basoria, sinón por nun cumplir colos procedimientos formales pa convocar un manifestamientu na cai.
Frente a la inseguridá social que sofrimos (paru, precariedá, emigración...) l’Estáu respuende cola xeneralización de la videovixilancia o l’aumentu de places de policía. El discursu de la seguridá ciudadana ye la única fonte de lexitimidá pa un Estau que nin quier ni pue iguar tolos demás problemes.

¿Un puñu ensin brazu?
Normalización de la represión n’Asturies

Procedimientu xudicial escontra los trabayaores del seutor naval, específicamente escontra Candido G. Carnero y Juan Manuel M. Morala, con pedimientos yá non solo de multes sinón tamién de penes de cárcele. Concentración facista en Cangues d’Onís, autorizada pol Delegáu del gobiernu español n’Asturies, con prevocación policial y carga escontra la concentración antifacista, con resultáu de 14 deteníes y un total de 22 presones imputaes. Aplicación de la Llei antiterrorista a un militante independentista, con filtración policial a la prensa de semeya y datos presonales del deteníu, rellacionándolu con toes y cauna de les esplosiones ensin esclariar nos llares de partíos y sindicatos españoles ocurríes n’Asturies de magar el 2000 fasta agora, con campaña mediática de criminalización. Multes a 12 presones que se manifestaren pacíficamente nun actu de protesta escontra l’aplicación de la Llei Antiterrorista a F.G.R. Multes a delles organizaciones por pegar cartelos convocando un manifestamientu autorizáu. Activistes multaos por faer pintaes en Corvera. Actuación xudicial escontra los pescaores de L.luarca que se movilizaron escontra l’esfarrapamientu marítimu que suponen los bolos gallegos. Seguimientos policiales y pinchazos telefónicos a xente d’estremaos movimientos sociales, políticos y sindicales. Campañes municipales de descartelización y d’esborriáu de muriales y pintaes, siempres que se traten de temes políticos en Xixón, Mieres, etc. Ganaeros de Porrúa pendientes de xuiciu por dar una cencerrada al presidente del “Principado”. Militantes independentistes deteníos ya identificaos a los que se-yos secuestra’l material de propaganda (Llangréu). Multes por participar n’una concentración pacífica n’ Uviéu pola soberanía alimentaria (que diba faciéndose per 9 años ensin dengún problema). Descomanada carga policial escontra una concentración de trabayaores d’IZAR demientres la inauguración del acuariu xixonés....
Paecen custiones estremaes, pero son lo mesmo. Falamos d’un procesu represivu que respuende a una política de criminalización cola que l’Estáu español da rempuesta a los estremaos conflictos sociales y políticos que carecemos n’Asturies.
Una ofensiva antidemocrática que tien un responsable políticu: Antonio Trevín Lomban, Delegáu del gobiernu español y miembru de la FSA, y un gobiernu del “Principado” (PSOE-IU) que non solo nun custiona’l vergoñante tutelaxe que supón esta figura de Delegáu, sinón que da por bona la política represiva que práutica.

Porque atalantamos qu’esto nun pue permitise, y que frente a ello les rempuestes tienen de dir acullá de los casos concretos y puntuales, fáese pernecesario trabayar a comuña la represión n’Asturies. Y eso ye lo que dende Calecer vos proponemos: un espaciu dende’l que poder, toes y toos xuntos, trabayar escontra la represión y les sos causes.

Calecer (Coleutivu asturianu escontra la represión y poles llibertaes)

0 comentarios