Carlismu y lliteratura asturiana
Javier Cubero acaba d’asoleyar en Trabe Del Romanticismu al Rexonalismu: escritores carlistes na lliteratura asturiana, que fue, nel so día, premiu “Fierro Botas” d’ensayu.
Empondero’l llibru y recomiéndolu.
En primer llugar, porque sigue afondando nuna xera que s’entamó fai poco, la de facer ver que la hestoria d’Asturies (la sociedá asturiana) fue más que la dictadura de Franco (o, más vagamente y más atrás, el dominiu “malváu” del capitalismu) y les organizaciones obreres con raigañu na I y II Internacionales (esto ye, los teóricos o reales pás de les organizaciones sindicales y polítiques hexemóniques güei).
Javier Cubero afonda, entós, nesa llinia que yo, modestamente, abrí fai tiempu y na que profundizó de forma notable Pablo San Martín Antuña: la de señalar que, enantes y además de les organizaciones güei hexemóniques nel discursu, hebo más hestoria: federalismu republicanu, federalismu de dereches, carlismu federativu, xuntaxeneralismu foral, etc. Nuna palabra, una realidá munchu más enriquecedora que la que se nos quiso pintar.
En segundu llugar, el llibru de Javier vien sorrayar un aspectu perimportante de la nuestra tradición cultural, política y lliteraria: la xuntura de lo más importante d’ella con posiciones relixoses, tradicionalistes, foralistes, etc. y, pela cueta, la oposición de les organizaciones obreres (salvo, en parte pequeña, les de mena republicano-federal) a l’autonomía, la llingua y la cultura asturianes.
El llibru de Javier, que nun se llimita a Asturies, sinón qu’ensierta la tradición carlista y “conservacionista” nel panorama xeneral européu de resistencia a la uniformidá, a la pérdiga de tradiciones y a los efectos sociales afarantes de la revolución industrial (colos sos arreyos casi universales al monarquismu, a la relixón y al campu), ye, per otru llau, un llibru profundu y interesante.
Sólo una cosa, al marxen de lo dicho, y a propósitu del Padre Galo, reconocíu de forma xeneral como un gran poeta y como un poeta “modernu”: ¿En qué estáu m’atopaba yo les varies vegaes que lu lleí que -salvu daqué rellumucu ocasional- inxamás fui pa ve-y al cadavedián tales virtudes?
0 comentarios