PARTÍU CARLISTA D\'ASTURIES. Ye la rempuesta. 35

Carlos X. Blanco

El paisaxe ástur nun ye un paisaxe de cualisquier mena. Tou fiu del País sabe esto. Mesmamente, cuando hebio intentos d´integralu en xunidaes ficticies, como la d´un supuestu “Cantábricu” homoxenu, o un “Noroeste” ibéricu, toa presona que se fixe nos viaxes y esploraciones sabe qu´hai, pencima de les señes comunes colos d´otros paises norteños, una identidá ástur mui diferenciada. Esa identidá guarda rellación cola propia aición de los ástures-asturianos sobro´l paisaxe de so demientres milenios. Foi la Casería la institución responsable d´esti paisaxe tan estremáu. La Casería tien xunidaes homólogues enforma nel casu de les granxes gallegues, montañeses, vasques, sí, pero tamién coles granxes centroeuropees y celto-atlántiques, arriendes de les escandinaves. Too esto de les comparances y les homoloxíes con entidaes agropecuaries non-ibériques hai que lo decir siempres al alto la lleva, anque seya namái que pa contrarrestar los llargos sieglos d´asimilacion castellanista y mediterránia, que oficialmente llucha dende entós por introducinos nunes órbites culturales cuyos influxos aporten a nós fasta ciertu puntu, pero que nunca nun hai que desaxerar. La sociedá tradicional asturiana ta inxería fonderamente nun “Mare Nostrum” alternativu al Mediterrániu, y que foi l´Atlánticu de tola vida.

Yá dicía en tiempos el Vizconde de Campugrande, aquel cabezaleru de la Xunta Rexonalista del Principáu, que si Asturies pudiere haber mercao´l trigu que-y faltaba na Europa Atlántica, na costa francesa o bretona, mesmamente, otru gallu nos diba cantar a los asturianos, envede mercalu caru por fuercia de Llei y Monopoliu a los nuesos amos, los castellanos. Si tenía razón o non, el casu ye que la integración en “imperios” (como diz J. M. Colomer nel so ensayu “Imperios Grandes, Naciones pequeñas”, Anagrama, Barcelona, 2006) del tipu Xunión Europea, va sirvir, ente milenta coses males, pa degolver a la realidá la braera estructura de rexones económiques “naturales”. Hai un cientu d´intereses que mos xunen cola Meseta, ye verdá, pero tamién con otres “Rexones naturales” coles que calteníemos contautu dende la Edá del Fierro, pasando pela Edá Media y el nomáu Antiguu Réxime.  

No cincante al pasu pa la Meseta, la gran testonería ilustrada de Xovellanos yá ye un fechu: ye realidá que les comunicancies meyoraron, pero tamién ye un fechu que l´influxu de les influencies tien más pesu que seya nel sen de Sur a norte que de Norte a sur. Los pueblinos del Norte de Lleón son fonderamente asturianos en cuantes a la llingua, la morfoloxía de les Caseríes, el paisaxe de montaña, etc. Y dame muncho dolor que cásique nunca nun pensamos n´ellos. Pela cueta, influyencies mui, pero que mui sureñes, aporten fasta les orielles del Cantábricu como si foren lleis inexorables. Cuando ún va pol Muro de Xixón en branu, paez que podía tar en Torremolinos o un sitiu peor. Nun yá pola fala de los turistes, que tienen drechu a tener la que rialmente tengan, sinón pol asonsañar de los nativos, que yá toquen les palmes como si foren andaluces, davezu pa risión de los mesmos sureños.

Tamos aculturizándonos, en suma, y había mester facer dalgo. Tantu túnel del Güerna, tanta autovía, y ello nun mos val pa dar un abrazu al hermanu lleonés. Quieren los lleoneses ser autonomía dixebrada d´una ficticia “Castiella y Lleón”, tan ficticia como “Castiella-La Mancha” y otros inventos de Peces-Barba y Cía. Munchos lleoneses falen como nós (anque cada vuelta, menos) y foron Reinu confederáu col nuesu, l´asturianu. Ensin espansionismos de xuguete, de xuro digo qu´hai muncho d´asturiano nel nuesu vecín, y –arriendes d´ello- muncho de lleonés stricto sensu que nun ye “castellano” entovía. L´abrise a la Meseta nun mos valió p´abrinos a los vecinos ya hermanos del sur. Al empar que nun se fain estes aliances y nueves hermandaes, asistimos coles manes ataes o los brazos cruciaos al espectáculu terrible de la “despersonalización”, que ye tantu como dicir la “globalización”. Los militantes de la nuesa “Esquierda Plural”, al mesmu tiempu que sofiten actos de terrorismu cultural, eco-paisaxísticu y económico contra el so “Principáu”, falen entovía la xerga “cheli” d´aquel Tierno Galván (q.e.p.d.), el dialectu que diz “a colocarse y al loro”, y qu´en términos oficiales llamen “Español”. Y estos “chelis” y falantes de “caló amestao” son los que mos enllenen el país de llinees d´alta tensión, centrales emisores de basoria, regasificadores, autovíes y quésiyo cuanta porcancia más. Como son unes bases despersonalizaes yá enforma, asomeyaes a los indios de reserva alcoholizaos pol güisqui yanki, cuenten con despersonalizar un paisaxe tan antiguu y esencial como ye´l paisaxe ástur, que caltien nel so ñuedu les instituciones humanes venceyáes: casería, parroquia, conceyu, Xunta.... 

Hai que tornar, Asturianos, al nuesu sitema de círculos concéntricos, volver a pescudar nel interior de nós mesmos, y asina sabremos volver a abrazar a los hermanos nuesos, los de cerca y los de llonxe.