PARTÍU CARLISTA D\'ASTURIES. Ye la rempuesta. 35

Carlos X. Blanco. 

Nos caberos díis camburaron milenta semeyes de los Reis. Dizse en dellos ámbetos que tal actu va repetise, que nun va ser l´unicu. La prensa “oficial” nun sal de l´avezada tónica de les condenes morales. Un panexíricu tres otru. Que si los Reis son cabezaleros protagonistes del cambeu dica la Democracia. Que si la Casa Real paró´l guelpe d´Estáu del 23-F. Que si la Constitución y el marcu de llibertaes son deldes contrayíes por toos nós pa con Xuan Carlos I. Etc, etc. Tres les defenses d´esa triba de lliteratura apoloxética de los Reis y, al empar, Condenatoria de los “republicanos” y los “separatistes” hai, con tou y con eso, della crítica fríngole a conductes concretes del Rei o de miembros de la so familia. Que si´l gastu que fain ye escuru. Que si a cuántos hai que mantener a cuenta de toos los ciudadanos. Que si de xuru nun somos yá adultos como pa requerir esti Rei, y más con esti marxe de maniobra tan descomanáu como´l que paez tener nel Estáu Español, muncho más alló de lo simbólicu.  

Nestes llínees, como ye natural, nin quito nin pongo rei. Namás que digo que me paez que l´alderique ye bien probetayu y l´altor de les critiques esquitaes pela quema recién de semeyes nun me paez mui aquello. De xuru que tan camudando delles coses nun Estáu como esti, normalmente tan amordazáu con un tema que llehó a ser tabú. Pero d´ehí a decir qu´hai un alderique teóricu ente la ciudadanía alrodiu del tema “Monarquía o República” hai un cachu mui llargu de camín. Nun cuido qu´esti alderique tea presente daveres na sociedá, sacantes dellos seutores y rexones xeográfique au nunca nun esanició. Nun ye un secretu qu´en países como Catalunya y Euskal Herria cuéntase con llargues tradiciones republicanes, nel primer casu, y polo menos anti-xuancarlistes nel segundu, dende bien de tiempu.  

Non, nun me paez qu´esi seya´discutiniu braeru d´estos díes. La sociedá d´anguaño nun ta mayoritariamente preparada p´aldericar n´astrautu si lo meyor ye Monarquía o República. La sociedá del sieglu XXI tien más bien una riestra de reflexos emocionales, heriedu de la pasada guerra civil, y en función d´ellos hai un agrupamientu un aquellu artificiosu de les esquierdes xunta la República y les Dreches xunta la Monarquía, entendiendo que la evolución socialdemócrata, primero y centroderechista depués, protagonizada pol PSOE y IX, nestes caberes décades, fain que´l republicanismu en dellos socialistes y comunistes d´anguaño seya “teóricu”, o ni eso tan siquier: ye duldoso enforma. Son “xuancarlistes” fasta la cañamina los más d´ellos. Tamién ye sabío que fasta la guerra de 1936-39 hebía un derechismu republicanu bultable, que dalgún día resurdirá, anque seya numái que como posibilidá lóxica. 

Nel fondu, el discutiniu agora nun ye esi de “Monarquía o República”. Bramente, lo que ta en xuegu ye otra cosa: ye ni más ni menos que la “llexitimidá” de la nomada Transición, y de la forma na que se fexo. ¿Hebía mester de tantes concesiones a los franquistes? Un Borbón puestu por Franco pudo ser estrumentu pa delles fuercies, reformistes inclusu, que con too y con eso ñacieron o esporpollaron dientru´l vieyu réxime. Pasaos trenta años, agora que nun paez que la menacia de militares golpistes seya creíble (¿o non?), quiciabes yá va siendo tiempu de que aquellos “pautos” y “consensos” seyan oxetu de revisión. Anguaño, les fuercies “reformistes” (PSOE, PP y IX) quieren tenenos a toos nuna especie de Transición Permanente, y eso ye una cosa que nun pue ser. Lóxicamente-yos va de pelres dientru del sistema, onde esfruten del Poder, o de los márxenes llambiones del Poder, na Oposición, esperando riola, remanando autonomíes o alcaldíes de ciudaes. Dacuando, sal un Espadón metiendo mieu con eso de la “Xunidá d´España” en permanente peligru de frañer. Y asina, los fieles militantes y votantes cierren files alrodiu de les sos files, amedranando al restu indecisu de la sociedá con aquello de qu´ellos son “Patriotes Constitucionales”, ye dicir, faciendo un piñu oficialista que sigue sacando partíu d´una Transición nunca acabada. 

Más qu´una torna astrauta de la República, en dellos ámbetos lo que ta naciendo pali que pali ye un nueu modelu de convivencia ente los pueblos y naciones que güei formen l´Estáu d´España. Hai crisis de llexitimidá nesi modelu d´Estaú burgués, emanáu cuando la Transición, estáu democráticu-formal, xixilaú pelos poderes fácticos d´entós, qu´entá siguen siendo los d´anguaño. 

Y ye que la crisis de llexitimidá ye una cosa mui seria. El talantamientu de munchos ye´l que sigue: si esti Rei, qu´equí nun pinta un res (y eso pensábenlo franquistes asgaya, y non solo republicanos “teóricos” de la esquierda) foi impuesto “nun mesmu paquete” con otros ingredientes constitucionales, col envís d´aparar un guelpe d´Estáu... y si yá nun hai Espada de Damocles dala... ¿Pa qué un Rei si esti pue ser un pilancu pa nueves reformes “territoriales”? 

El problema “territorial”, ye nidio, nun solo ye territorial. Ye un problema sobre la sencia de lo que ye “España”. L´autonomismu d´anguaño, en contra de lo que se mos quier decir dende ámbetos socialistes y comunistes, nun ye realmente un federalismu. Tampoco hai qu´engañar, como fai la derecha, diciendo que foi una “concesión”. Nun soi a maxiname lo qu´asocedería en dellos países del Estáu en casu de querer en Madril testonear col centralismu franquista... Nun ye una mera alministración “Rexonal” dientro de la “Indisoluble Xunidá de la Patria”. L´Autonomismu foi una solución provisional intermedia ente´l reconocimientu al Drechu al Autodetermín –desixíu en dellos países- y la necesidá de nun dexar al bentestate a aquelles “rexones” que nun lu reclamaben, pero a les que tamién-yos diba venir bárbaro una descentralización. Que la figura d´un Rei –y máximu xefe militar- quedare configurada propagandísticamente un pocu al mou del Antiguu Réxime, como “Padre” de la patria, una patria conformada por dellos “reinos” autogobernaos... eso nun foi más que falsa concenxa, ideoloxía pura, porque les coses nunca nun foron asina. Toa la xente, sacantes los difusores de la ideoloxía oficial, sabíen que la esistencia de torgues llegales al desendolcu competencial, la esistencia de los Delegaos de Gobiernu, la xerarquización d´autonomíes de primer, segunda y tercer división.... son recordatorios de que los ceremoniales del xuancarlismu teníen un aquello de farsa. 

N´Asturies, velequí, nun tenemos más que farsa tres farsa. Tou esi fastu de los Premios Príncipe d´Asturies, regalando millones al que yá los tien na so particular corexa, les declaraciones covadonguistes y pelaxianes alrodiu de l´asturianidá de Leticia y entá más, de la mesmísima Monarquía Española anguaño reinante, solo puen valir pa ganar una estomagada. Y entós, con más semeyes camburando díbamos a ver si la Corte decide instalase equí, onde tantu cucho hebio siempre pa fertilizar el so resurdimientu. Esti tarrén tan verde y tan guapo yá lo fexo con Pelayo ¿non?