PARTÍU CARLISTA D\'ASTURIES. Ye la rempuesta. 35

Carlos X. Blanco.

Asturies nun termina de ver cómo abocana´l cielu. El so cielu cuantayá que ye bien buxu. El carbón y la faraónica ENSIDESA rincíenlo too de gris tirando a prieto. La inercia electoral esplica nuna bona midida tantu votu a la esquierda “oficial”. La inercia nel ámbetu de les ciencies físiques equival al vezu y la balgana nel campu de les psicoloxíes colectives. La vieya “concenxa de clas”, por remebrar la terminoloxía marxista, ta detrás d´un curiosu garrapiellu de votos que van a parar a les dos fuercies cabezaleres d´esquierda oficial y pro-sistema: PSOE y IX. Xuntes superen enforma los 300.000 votos. Munchos asturianos dan el so votu a estos dos partíos españoles por ser ellos “inercialmente” d´esquierdes, por tener llercia a la derecha (que nesti Estáu ta a piques de ser ultra-derecha en bien de les sos actitúes), o quiciás porque nun ven con claridá otres alternatives... Hai que reconocer qu´esti modelu democráticu-formal ye, como toos, aritméticu. Un votu pocu o nada reflexonáu val lo mesmo qu´un votu fechu con concenxa de cambeu, con enfotu nel país astur pa que nel so cielu s´abra, por fin, un clarión. Un ciudadanu un votu. Lo que cuesta trabayu ye comencer a una masa “crítica” significatible de qu´esos votos pa la esquierda “oficial” son, n´Asturies, como l´agua tirada al mar. Son votos “neutrales” dientro de lo que ye un aplazamientu, sine die, tres trenta años de democracia formal, de la solución de los problemes nuestros.

El votu “inercial” fechu polos antiguos integrantes de la clas trabayadora, yá nun correspuende con una rialidá reconocible como entá yera la realidá económico-llaboral asturiana de los 70 y 80. Esta yera una cadarma yá fenetible, con dellos anuncios gubernamentales –autoritarios y achaplantes- de la so muerte anunciada. Podemos y debemos facer hestoria de lo qu´asocedió recién pa calistrar el nuesu güei. Pero tamién hai que reconocer que l´estroce yá ta fechu, y qu´una sociedá fecha d´asalariaos de la mina o la industria, dambes les dos mancaes de muerte, nun pue ser más oxetu de señaldá. La clas “proletaria” daquella –que yera tala nun sen marxista bien clásicu- ta güei reducida a mínimos. Pretender canciar al alto la lleva “La Internacional” en Rudermu, como fain Villa, Alfonso Guerra, Javier Fernández y Cía, y con ocasión d´otres liturxies sindicales y partidistes ye una groma de mal gustu, un sarcasmu vergoñosu por parte d´aquellos cabezaleros del puñu n´altu que traicionaron a los trabayadores asturianos ciarrando empreses, pozos, y abriendo cabeces y firíes con porres policiales nuna clas social que vía como morría por decretu. D´esto yá escribí asgaya. El colmu ye que´l tiempu nun paez discurrir nesti requexu del mundu. Asturies conxelóse nel tiempu, como indiquen los resultaos de les elleiciones y dellos indicadores económicos. Nun ye custión de tornar a los puestos cabezaleros de renta que tuviéremos pa los años 50. Güei sabemos lo ficitico que yera esi puestu, arriendes de la falcatrúa qu´escuenden les mesmes estadístiques económiques desarrollistes. Una clas minero-industrial numberosa nuna rexón “atípica” dientro d´aquella España rural y atrasada de posguerra, yera tamién la víctima de la esplotación, d´un desenraigonaminetu, d´una perda cultural, de paisax, y peor entá, víctima de les sos mesmes posibilidaes d´autovalimientu. Aquelles empreses públiques que caltuvo y punxo´l réxime de Franco taben pensaes con mentalidá “estratéxica” y política, en mou dengún con una mentalidá economicista (crematística o, como se diz anguaño, “competitiva”). Tampoco –nun mos engañemos- yera la idílica empresa “social” que dicíen amar los oligarcas del réxime, arrampuñando terminoloxía falanxista, xerga de la Dotrina Social de la Ilesia, o d´onde pudieren. HUNOSA, ENSIDESA, etc... Non. Yeren monstruos estatalistes, abellugaos dientru d´un contestu autárquicu que llueu camudó n´apertura a los mercaos mundiales y que solo con un proteccionismu alloñau de los fechos más palpuñables de productividá y remocique, aportaron como templos faraónicos a la dómina democrático-formal. Museos de la industria pública, ufríen espeyismos d´una vanguardia obrera que, sí, taba más adelantada en delles coses con respectu al atrasu de la mayor parte del Estáu (España yera un ermu industrial, sacantes Vizcaya, Barcelona y pocos núcleos más). Lo peor de la nuesa hestoria económica foi que los sucesivos gobiernos de la transición foron continuistas asgaya, atrasando dalgunes midides de “recorte”, fasta qu´un enchipáu gobiernu “d´esquierdes” decidió que llovieren por fin los palos.

Que nun me digan que n´Asturies hai odiu o rancor, porque cola de palos que dexaron cayer sobro la clas obrera, mandaos dar polos socialistes y los sos monaguillos de siempres (IX, güei IX_Bloque pol Engañu-LV), equí siguen ganando mayormente ellos. Esto tien mester d´otra esplicación más alló d´un inverosímil o pocu espardíu amor al enemigu, dando´l pueblu asturianu en cada convocatoria la otra mexella pa recibir más y más guelpes. O más alló de la esplicación de que bien de votantes siguen naguando por caltener la situación d´anguaño, de pocu futuru, efectivamente, pero bien abellugada por colchones de subsidios, subvenciones, prexubilaciones, etc. Que´l votu –tan numberosu- d´esa esquierda oficial n´Asturies yá nun ye mayormente un votu de la clas obrero, ye nidio. Ye abegoso facer intuitivamente una socioloxía d´esi ellectoráu, pero hai que lo facer pa pescudar alternatives.

Hay bien de xente de la clas media dientru d´esi votu. La clas media ye, en sí mesma, mui heteroxénea. Fluidamente, repártense ente votos a la derecha (PP) y la esquierda oficial (PSOE-IX). Un porcentaxe significatible d´ellos, camuden pa un lláu o otro sigún coxuntures político-económiques, o les más de les vegaes, mediátiques, pero coxuntures de mui a ras de suelu. En suma: nun tienen ideoloxía dala. Ye un grupu numberosu de ciudadanos que, nel sen más lliteral de la parola, son “conservadores”. Tienen llercia al cambéu drásticu y radical. Nun ya a un cambéu revolucionariu, simplemente mieu a salir de la “inercia” col apueste qu´eso pue significar pa un gobiernu: pue salir bien o pue salir mal.

Nun descubro nada nuevo si digo que n´Asturies hai poca clas media autosuficiente. A última hora espoxigaron más autónomos y pequeños-medianos empresarios na estaya central del país astur, pero costó munchos años francer el tradicional modelu cásique hexemónicu del asalariáu astur. Esi modelu del mineru, obreru d´ENSIDESA, funcionariu, etc. Un pais, Asturies, con malapenes empreses pequeñes y medianes, arriendes de cooperatives. Tolo contrario d´Euskal Herria, por exemplu, que cuntaba con una Vizcaya mui asemeyada a nós en cuantes a problemes de reconversión, pero que pela cueta sí tenía munchos empresarios pequeños y medianos, arriendes de cooperatives asgaya.

Clas media asturiana a la que-y va bien de momentu tar como ta, colos “colchones” que son cómodos pa siguir esfrutando d´un bon nivel de consumu (ociu, servicios, bones posibilidaes d´estudiu pa los fios, asistencia sanitaria de nivel aceptable, etc), pero tamién con hipoteques morales (les peores) que tan acabando cola mesma auto-estima de los asturianos. Siguir viviendo como si fueres productivu, con un determináu nivel de consumu, ensin selo yá, sólo va aguantar una o dos xeneraciones. Esti ye un modelu inercial que nun va abocanar. La mesma continuidá reproductiva, xeneracional, que necesita toa formación social, dalgún día va reventar.

La pirámide d´edá asturiana vien en contra que camuden les coses d´equí a cuatro díes. La xente instalao, los xubilaos y prexubilaos, los que tienen escosáu´l so ciclu llaboral, van votar a piñón fixo. Lo mesmo se pue dicir d´esi “progresismu” tan mal entendíu que xunce´l tradicional mieu a la derechona neofranquista cola falta de soluciones y perspectives de futuru pal país astur. Son estes, soluciones y perspectives les que se tienen qu´atopar dende estayes sociales que son o nagüen por ser bramente productives. Estayes como la mocedá, la muyer, el paráu, que precisamente por nun recibir ayudes y nun esfrutar de colchones propios del parasitismu yá camentáu, tienen que dar con otres ideoloxíes y otra praxis pa la so mesma vida.

La nueva Asturies non parasitaria, granible nel más estensu sen de la pallabra, tien que tener unes obligaciones pa col país y pa con ellos mesmos. Hai que mirar pol campu, pola so propia condición granxera autosuficiente, tradicional y ecolóxica qu´equí vieno a nomase “Casería”. La agricultura ecolóxico, y el regresu de la mocedá al campu son les víes de solución pa con esti país, que ye un ermu demográficu en bien de conceyos. Esta xente tien que sofitar a les fuercies y coleutivos que lluche por meyorar les facilidaes empobinaes a repueblar el campu y saca-y partíu colos preseos de comercialización y de producción ecolóxico y de calidá que güei se conocen y que nun esistíen en tiempos de los nuesos güelos.

Tamién hai qu´atropar a tolos coleutivos vecinales, ecoloxistes y demás víctimes del desarrollismu socialista, pa que militen d´una forma integrada nuna plataforma bien grande, alternativa a la izquierda oficial, que pongan toa triba de pilancos al asfaltáu xeneral del país, a la construcción de la enésima autovía, urbanización o campu golf. La demanda local en pro del nuesu paisaxe tien que tresformase nuna demanda nacional, del ámbetu asturianu ensembre.

La tema de la llingüa asturiana tien que se tratar de manera integral colos otros temes que se refieren a la identidá del nuesu pueblu, del caltenimientu del so paisaxe, de la sobrevivencia de la mesma Asturies como pueblu. Munches de les torgues qu´atopa la reivindicación llingüística del asturianu tienen que ver, nos caberos años, cola indina separtación que se quier instalar ente reivindicación del idioma (como drechu civil, sigún se diz) y la defensa del país na so totalidá. ¿Ye que la defensa d´un drechu fundamental almite una (mala) escolástica separtación ente lo individual y lo coleutivo? Nun ye un sagráu deber de la Política (con mayúscules) defender los drechos básicos, que se dan en dambos dos ámbetos- individual y coleutivu? Y otru entrugu más: ¿Ye diferenciable la defensa de la nuesa autosuficiencia y autoxestión económica como asturianos, de la defensa de la nuesa identidá ecolóxica, paisaxística, llingüística, etc....? Como los problemas del país nun se puen separtar, los coleutivos que lluchen atomizadamente pa solucionalos, tampocu.